林鄭月娥 與曾蔭權爵士合照背後嘅暗戰

林鄭月娥 係梁振英當政年代嘅政務司司長，由於有人指佢有份出手隊冧唐英年，所以被視為梁系中人。只不過， 林鄭月娥 個藍剔fan page，出現一張好匪夷所思嘅想，就係喺新春團拜，同曾蔭權爵士夫婦嘅合照，意義非比尋常，相信一場暗戰早已爆發。

林鄭月娥 再度轉換派系

呢件事係十分離奇，有幾點係值得留意：

1. 曾蔭權爵士係坐過監，但擺明係因為梁振英做佢，依家 林鄭月娥 係同佢合照。
2. 無同梁振英嘅合照
3. 同董建華嘅合照係貌合神離
4. 出現終審法院退任前首席大法官李國能嘅合照
5. 有獨立同馬時亨傾偈嘅相

林鄭月娥 成堆相，但政治信息一大堆。但最明顯係 曾蔭權爵士 ，無錯， 曾蔭權爵士係佢老上級，叫佢由倫敦返嚟果個就係曾蔭權爵士，但佢可以選擇保持距離，佢係暗示佢其實已經歸隊返曾黨，大家都知曾黨係好奇異嘅一樣嘢嚟。跟住無梁振英合照，同董建華貌合神離，即係唔妥梁振英、董建華背後嘅集團。而終審法院前首席大法官李國能，一直都係另一個中國方面眼中釘，因為佢同佢嘅大弟子，曾蔭權爵士年代嘅律政司司長黃仁龍資深大律師，都係同中國方面唔多合作。 林鄭月娥 係有意發出政治信息，無錯，佢做緊某啲仆街嘢，但佢其實係曾蔭權爵士果系成人馬嚟。

依家 林鄭月娥 嘅內閣，其實有部分唔係佢啲人，至少劏房波同垃圾桶劉江華一定唔係，而內閣成員，特別有張相要留意，尾果張盧偉聰係特別highlight，應該暗示警隊係效忠於 林鄭月娥。

仲有一樣嘢， 林鄭月娥 嘅 Facebook Post 係故意用香港語寫，我留意到 林鄭月娥 好多個Post都係用香港語寫，梁振英係打死都唔用香港語出post，而用香港語出post，本來亦唔係政府一貫做法同安排，好多泛民中人都做唔到用香港語出post(你估我呢度，我用香港語寫嘢十年)，所以 林鄭月娥 呢啲舉動，唔係突然興之所至，亦唔係要迎合某啲人，而係有佢嘅政治信息想講出嚟，畢竟佢可能知嘅嘢，比好多尋常香港市民係多好多。

林鄭月娥 個Facebook平日我特別去理佢，只不過同港人講地一樣，我當職務必須嘅厭惡性資料咁處理佢，但依家，我睇有一場暗戰，其實發生緊。