70年代前電視花旦李影於加拿大溫哥華離世，享年70歲。據指李影早前返港過年，日前於列治文的寓所內跌倒，今早傳出朋友上門時，李影表示不適惡心於是報警，醫護人員到場後實施心外壓急救，可惜最後不治。李影曾與藝訓班同學劉松仁拍拖7年，到1984年與商人沈海鍵結婚，兩人育有兩女，可惜婚姻只維持8年就分手告終。
李影不時返港參與唔同電視台演出止戲癮，好似1994年就同黎明、古天樂、宣萱等合作演出TVB劇集《阿Sir早晨》就最為人熟知。2003年李影同兩位千金回流香港，其中一位女兒沈穎婷2004年亦步媽媽後塵參選香港小姐加入娛樂圈，經過幾年發展之後決定轉職空中服務員。
對於母親驟逝，大女沈穎婷昨日於社交平台上表示：「多謝大家關心，我同妹妹依家返緊去加拿大接媽媽回家。大家有心了！媽媽為人好低調，平時鍾意同朋友出去聽歌，唱歌，玩，唔希望大家會為咗佢唔開心太耐。無太多想講，希望外界畀啲空間我哋。唔夠幾個鐘就全香港都知其實係勁嘅。李影的確係威嘅，證明好多人都好錫媽媽。好幸運能夠做你的女兒，下世約你再繼續呢段緣分啦！」沈穎婷妹妹Vivian就稱「李影今日好曳咁唔同我講電話就走了... 過咗幾個鐘就全香港都知... 我都話李影紅過家姐好多㗎啦... 知喇知喇... 知你靚女過我啦！我哋下世再做母女啦！李影... 我愛你！」
