Mr.面臨解散？成員MJ：我不快樂

樂隊Mr.去年主力喺台灣發展，今年六月先再喺香港出碟，正當歌迷以為Mr.正準備回歸本地樂壇，成員MJ（譚傑明）今日竟然喺社交網站爆出樂隊面臨解散危機！

MJ連日來上載《上天要我學會的？精神》系列長文，而劈頭第一句就話：「我不快樂。」佢表示2013年樂隊所經歷嘅種種指控都令佢感到好唔開心，而佢更心痛見到粉絲受到侮辱。

佢又提到2013年7月1日，公司喺佢哋不知情下安排Mr.參與一個音樂節，令Mr.捲入政治風波，差啲令樂隊四分五裂，更因此令Mr.要避走台灣八個月，佢寫道：「我們寫了太多叫人快樂的歌，卻沒有要真實的，去寫一首記錄我們真實而不快樂的歌。」

而同年十二月，樂隊其中兩名成員嗌交，差啲郁手，隔日晚上，Mr.開咗一個會議，MJ話：「會議內容，並不重要，重要的是在會議尾聲，其中一名成員的一句話。『完成下張廣東專輯後，我們便完結這隊樂隊吧。』」至今Mr. 其餘四位成員未有任何回應。