得知婉雯將離世 心如刀割
蘇詠儀是謝婉雯的中學兼大學同窗,感情最深。腦海裏無時無刻浮現謝婉雯坐在宿舍床上,捧着醫書埋頭苦讀的影子,她不禁嗚咽:「十年來,所有同學都好掛住佢!」她憶述,○三年三月初正待產迎接新生命,四月初卻得知婉雯入院。由於隔絕探訪,她負責聯絡後再將婉雯病情通知謝世伯及伯母。最了解病情的,是當時在婉雯留醫的「疫區」屯院A5病房工作的李舜華:「睇住佢最初肺片好清,直至氣喘、腎衰竭要洗血,已預計到就快唔得。佢都同媽媽講,自己可能返唔倒出去。」五月尾,兩人從深切治療部同事口中得知婉雯將離世,心如刀割。
攜子女到浩園探「香港女兒」
「十年前,係黑暗中有一隊盲人去醫病人!」李舜華笑談當年對疫症的無知,當時內科較少觸及傳染病,肺癆已是醫生最怕的傳染病。如今有關流行病,甚至中東出現的「新沙士」,她都緊密留意新消息,提醒後輩加強監察。她憶述數天前與新一輩前線醫生回顧沙士新聞,深層的痛苦回憶未能忘記,但總有得着:「我們呢一代肯定係『大時代』!我哋先感受到,洗手、換袍等細節,點解都要咁小心!」若不幸疫症重臨,會否義不容辭上戰場?兩人不約而同:「作為醫生一定有責任幫手,但唔希望有這一天!」
記者戴碧怡 曾愷欣