43歲周國賢（Endy）近年歌影雙線發展，開show拍戲又拍劇，在新戲《全世界都有電話》中，最大挑戰是大部份時間跟電話做對手戲。對被指身形又瘦又乾，近睇塊面皮膚質素麻麻的Endy，反而好滿意磅數多年來維持63至65kg，覺得好瀟灑。對於連登仔經常以其唱歌唔夠氣作話題，唔多高興的Endy作出反駁，「佢哋可能睇緊幾年前嘅片。」採訪：杜杜 髮型:Eve Chiu 化妝:Winki Tsang
Endy不認識導演黃浩然，但接到對方電話後即答應演出，「佢叫我演一個由頭到尾都係打電話嘅人，總之揸住部電話得㗎嘞，我未試過，好似幾有挑戰性、幾有趣咁喎！故事大綱係講3個同學喺25年後兌現承諾，我咁啱又係嗰個年代嘅人，所以幾寫實。」
跟Rosa陳湛文fd咗
因為電影題材寫實，拍攝初期Endy都覺得幾輕鬆，「唔使特登去chok，做返平時自己踢拖落街，導演又冇乜特別要求，冇咗某種壓力，好率直咁做返自己就得。」但齋攞住電話做戲，演落才覺得難，「我要諗埋電話裏面對方諗緊乜，個腦要分開兩邊。」特別有場戲在渡輪上拍，因有乘客要低調拍攝，未能搵人幫手講電話中的對白，令他諗到頭爆，「我用慣右腦，比較圖像化，突然間要用好多左腦，好有挑戰性，加上我隨感覺演戲，未必每個take會做返一樣嘢，哈哈！」
對於首跟韋羅莎（Rosa）和陳湛文（Peter）合作，Endy睇過好多Rosa的舞台劇，「一路都好想合作，今次終於有機會！當然有睇過Peter演《三夫》啦！我亦都有跟陳果導演合作過，所以我哋有好多話題。」他形容跟兩人既陌生又熟識，「雖然我唔喺APA（演藝學院）大，但我哋有好多common friend，我又演過幾次舞台劇。」三人唯一一場同場戲，就是講中學同學飯聚，拍攝過程令Endy好難忘，「雖然我哋現實唔識，但講返嗰個年代嘅成長經歷，打開晒話題就極速變friend，好似識咗好耐。嗰場戲我哋要扮醉，雖然冇飲酒，唔知係咪有啲muscle memory，大家好hyper，哈哈！最有趣拍到去感觸位，感覺好真實，唔係演出嚟。」
經常唔見電話銀包
Endy多年前曾代言手機，近年為方便創作亦機不離手，「好多音樂嘅idea都記錄喺電話，一諗到就錄起，好多最原始嘅demo都係用電話做，有時拍埋片，因為年紀大，彈完之後會唔記得點彈返，哈哈！連填詞都會，真係太耐冇用筆寫字，有啲字真係唔記得點寫。」雖然機不離手，但Endy經常忘記帶電話或唔見電話，「但我算幾幸運小寶寶，通常有人執到畀返我，兩、三年前搭車唔見銀包，都搵得返。」曾薄酬報答好心人的他，卻未被發現是藝人，「通常比較年輕或年長，都唔知我係邊個，哈哈！」
剛完成拍攝ViuTV新劇《無人之境》，Endy受訪狀態有點憔悴，其實近年他太乾又太瘦身形令fans好擔心，但當事人反覺得自己好肥，「我一攰就好腫，鍾意乾啲瘦啲，輕啲個人郁得快啲，唔想咁笨重，同埋我一肥就會冇咗個下巴，肚腩又凸出嚟。」他又稱多年來磅數上落不大，「除咗拍《一秒拳王》上過10幾kg外，咁多年都係維持63至65kg，可能舊年茹素一年乾身啲，今年會好啲。」他強調沒有刻意keep，保持身形跟飲食習慣有關，「我唔係好食澱粉質，麵包、粥、粉、麵、飯都冇乜興趣，連pizza都少食，但係大家放心，我係鍾意食嘢，係邊爐之鬼嚟，但好少食紅肉，鍾意食海鮮同蔬果。」
除了身形獲fans關注，Endy唱live狀態亦是連登仔長期討論topic，例如話佢鍊住把聲嚟唱或者唔夠氣，他就完全唔認同，「可能佢睇緊幾年前嘅片，未睇新嗰啲，我又唔覺有呢個問題。」Endy坦言有留意網上留言，第一次聽被指唱歌唔夠氣。問到近期最深刻留言？他說：「冇特別喎，都係正常嗰啲。」
《星島頭條》新網站有更多精彩內容：http://www.stheadline.com/
